Nagmando na ang alkalde sang Talisay City sa pagbutang sang police visibility sa Hacienda San Antonio 2, Barangay Dos Hermanas, Talisay City.
Sa interview sang Bombo Radyo Bacolod kay Talisay City Administrator Atty Jonathan Ealdama, may nagforward sang video sang lalaki nga nanutok kag nagpalupok sang armas luthang sa nasambitan nga lugar kay Talisay City Mayor Niel Lizares, gani siya ang gilayon nga nagtawag kay Police Lt Col Salvador Trono, hepe sang Talisay City Police Station.
Derekiba sang alkalde nga mapahamtangan sang police visibility ang duta nga gina-agawan sang mga Comprehensive Agrarian Reform Program (CARP) Beneficiaries kag nagapakilala nga tag-iya sang propedad nga si Paul Chang.
Ginpatawag man sini ang Municipal Agrarian Reform Officer (MARO) sa Talisay City kag ginmanduan nga magpatunga sa konflikto.
Paathag ni Ealdama nga ang tindog sang alkalde nga kun may konflikto, ini ang dapat tul-idon na lamang sa korte kag indi na maglapaw pa nga ibutang sa kamot ang hustisya.
Ginpaimbestigaran man sini ang lalaki nga nagpalupok sang armas, apisar nga wala man sang makita nga pag-atake sa iya nga masiling pagdepensa sa kaugalingon ang ginhimo.
Suno diri, kun warning shot ang plano, ang armas ang wala dapat gintutok sa sibilyan sa baylo sa ibabaw ginpalupok.
Pahanumdom sang alkalde nga indi dapat ibutang sa kamot ang layi.
Naghatag sang derektiba si Mayor Lizares sa pagpatawag sang duha ka partido upod sa MARO, agud ang ciudad ang makapatunga sa issue.
