Ginkalipay sang alkalde sang Victorias City ang madinalag-on nga pagbukas sang 25th Kadalag-an Festival sang siyudad.
Sa interview sang Bombo Radyo kay Victorias Mayor Javier Miguel “Javi” Benitez, madamo sang nagtambong sa kapistahan.
Suno diri, matapos ang duha ka tuig nga wala natigayon ang Kadalag-an Festival bangod sa pandemic, sa karun nagdangat sa kapin 7,500 ka mga indibidwal ang nagpadulong sa coliseum nga ginakabig largest indoor coliseum sa probinsya para magtambong sa aktibidades sang siyudad.
Nagpadulong man sa siyudad sanday Sara Geronimo, Matteo Guidicelli, Daniel Matsunaga, Kylie Verzosa, Marco Gumabao, kag Billie Hakenson.
Una man nga bes nga gintigayon sa siyudad ang glow in the dark fun run nga ginpartisiparan sang ginatos ka mga participants.
Ginkalipay man sang alkalde nga nangin pamaagi ini para sa pagsanyog sang negosyo, turismo kag pag-ingganyo sa mga investors nga magsulod sa siyudad nga kun ini ang maluyagan sang mga pumuluyo, apisar nga regular ukon ordinaryo lamang nga adlaw, mahimo sang mga ini mapadulungan.
Nagbaton man sang pagdayaw ang alkalde sa madinalag-on nga selebrasyon sang 25th Kadalag-an Festival sang Victorias City.
