Padayon ang imbestigasyon sa gina-alegar nga pag-abduct sa 3rd year college student nga babayi sa Bangga Patio, Burgos St., Barangay Villamonte, ciudad sang Bacolod, nga nakit-an sa ciudad sang Bago sang Miyerkules.
Madumduman nga santo sa pahayag sang biktima sa mga kapulisan sang Bacolod Police Station 4 pasado alas- 8:00 sang gab-i sang Miyerkules, nagalakat ang biktima sa dalan Burgos sa ciudad sang Bacolod para magbakal sang sud-an sang may nagbalabag sa iya nga puti nga van kag pwersado nga ginsulod ini sa salakyan.
Sa sulod sang van may apat ka mga lalaki nga suno sa biktima wala sang tabon ang ila mga nawong.
Ginhigtan sang straw ang liog sang biktima kag ini ang naka-angot man sa higot sa iya kamot.
Kapin, alas-10:00 sang gab-i nag-untat ang van sa bahin sang Barangay Sampinit ciudad sang Bago, kag nanaog ang duha ka mga lalaki para manigarilyo kag mangihi.
Bangod nga may gamay nga bukas ang salakyan, nagka-tsansa ini nga maglumpat kag malagyo.
Kasunod sini ang biktima ang nakit-an sang mga nagapangita sang damang kag gilayon nga gindala sa Bago City Police Station.
Sa interview sang Bombo Radyo kay Bacolod City Police Office Director Colonel Joeresty Coronica, ila ginpadulongan ang area kun diin natabo ang abduction kag didto may yara sang CCTV camera apang sa ila pag-review sa footage humalin alas- 7:00 sang gab-i tubtob alas 10:00 wala sang may nakit-an sa CCTV nga may natabo nga abduction dugang pa nga wala sang may nakit-an nga babayi nga naka-yellow nga tshirt kag pula nga short nga amo ang ginasuksok sang biktima sang siya ang nakit-an.
Dugang pa nga palamangkotanon suno kay Coronica, amo nga wala man sang may mabaklan nga sud-an sa area nga ginkadtuan sang biktima.
Apang, paathag ni Coronica wala nila ginapanas ang posibilidad nga may natabo nga abduction bangod posible man nga sa iban nga area ini natabo kag amo nga sa karun padayon ang imbestigasyon.
