BACOLOD CITY-Patay ang isa ka ginapahayag asset sang tropa sang gobyerno matapos ginluthang sang mga gina-alegar miembro sang New People’s Army (NPA) sa banwa sang Ilog.
Tadtad sang bala ang lawas sang biktima nga ginkilala kay Ricky Castro, 40-anyos, isa ka mangunguma kag residente sang Sitio Indakpan, Brgy. Canlamay sang ini ang ginluthang sang gina-alegar 12 ka NPA members.
Si Castro ang ginpaarakan luthang gamit ang M16 rifle samtang yara sa talamnan.
Suno sa hepe sang Ilog Municipal Police Station nga si Police Major Norberto Barniso, may yara sila sang nakuha nga impormasyon nga asset sang tropa sang gobyerno sa kabukiran ang biktima apang ila pa ini nga iga-validate.
Sa pag-usisa sang kapulisan, may nabaton na nga death threat ang biktima nagligad nga tuig rason nga nagpadulong ini sa Manila apang nagbalik man ini sa ila lugar.
Sa karun may natumod na nga persons of interest sa krimen ang Ilog police apang nagbalibad anay ang hepe nga ibuyagyag ang ngalan sang mga ini bangud nagapadayon pa ang ila imbestigasyon.
