Padayon nga ginaimbestigaran sang Talisay City Police Station ang gina-alegar nga pagpangharass sa Barangay Concepcion, Talisay City, Negros Occidental kahapon sang aga.
Sa interview sang Bombo Radyo Bacolod kay Police Lt Col. Salvador Trono, hepe sang Talisay City Police Station, nagpablotter na ang natungdan nga nag-alegar nga ginpilit nga ginsulod sang pila ka mga persona ang ila balaligyaan apang ginpunggan man sang tagbalay.
Suno kay Trono, wala pa ma natumod kun sin-o ang mga persona nga luyag magsulod sa nasambit nga puluy-an.
Ini ang ginaimbestigaran nila sa karun agud matumod ang mga persona kag mahibaluan kun ano man ang tinutuyo sang mga ini sa pagtuyo nga sudlon ang isa ka balay.
Nagpasalamat man ang hepe nga wala sang may nasamaran sa insidente kag wala sang nadala nga mga armas ang nagtuyo nga magsulod sa nasambit nga puluy-an.
Nagpanawagan man si Trono sa magtimbang nga kampo nga nagapapili agud nga magserbisyo sa ciudad sang Talisay nga sila na magcontrol sang supporters agud malikawan ang pagluntad sang kagamo nga may kaangtanan sa politika.
