Patay ang ginaalegar katapo sang New People’s Army (NPA) sa engkwentro batok sa militar sa Sitio Mabanga, Barangay Bagtic, La Libertad, Negros Oriental.
Suno kay Capt. Raymond Jamisal, spokesperson sa 79th Infantry Battalion sang Philippine Army, nakabaton sila sang report gikan sa mga pumuluyo sang Barangay nga may presensya sang rebelde nga grupo sa lugar gani gilayon man nila ini nga ginpadulongan.
Sa ila nga pagsaka sa Barangay nga makabig boundary na sang banwa sang La Libertad kag banwa sang Guihulngan, ginpalukpan sila sang ginabanta 15 ka mga persona nga ginapatihan katapo sang Leonardo Panaligan Command sang NPA.
Nagdugay ang pagbayluhanay sang lupok sang pila ka minutos kun sa diin nagtuga ini sang pagtaliwan sang isa ka katapo sang NPA nga tubtob sa karun wala pa makilala.
Narecover man gikan sa lugar ang isa ka improvised explosive device (IED), cal. M16 rifle, mga magazine, solar panel, apat ka mga cellular phone kag mga subersibo nga mga dokyumento.
Maswerte naman nga wala sang nasamaran sa bahin sang mga militar.
Sa karun ang bangkay ang yara sa punerarya La Libertad, samtang ginahulat naman nga may magaclaim diri nga himata.
Ginpasalamatan naman ni Jamisal ang mga pumuluyo kag opisyal sang Barangay Bagtic bangod sa ila nga nangin kontribusyon nga nagapakita nga luyag na sang mga ini nga matapos ang insurhensya nga nagakatabo sa Central Negros.
Sa karun, nagapadayun naman ang operasyon sang militar agud nga madakop ang iban pa nga katapo sang rebelde nga grupo.
