Priso ang isa ka ginaalegar supporter sang New People’s Army bangud sa illegal possession of firearm and explosive matapos madakpan sa Sitio Tamao, Brgy. Langub, Escalante City, Negros Occidental.
Ang arestado nga si Francisco Laza, 53-anyos sang Brgy. Buenavista, Escalante City ang nakuhaan sang .38 caliber revolver nga may lima ka mga bala kag apple type hand grenade.
Suno sa Escalante City Police Station, nagasakay si Laza sa motorsiklo kag nagtinguha nga magpalagyo sang ginflagdown sang mga pulis sa checkpoint.
Nahulog sa motorsiklo si Laza rason nga ini ang nadakpan sang Negros Occidental Police Mobile Force Company blocking force samtang nagapalagyo naman ang kaupod sini nga driver.
Nakuha sa paghinakop ni Laza ang pila ka dokyumento nga may kaangtanan sa NPA-Roselyn Jean Pelle Command kag iban pa nga subersibo nga dokyumento.
Date of airing: April 8 2019
