Luyag sang presidente sang Alliance of Concerned Consumers in Electricity and Social Services (ACCESS) nga magtukod sang Energy Price Monitoring Council (EPMC) agud matun-an ang pagsaka sang balayran sa kuryente.
Sa interview sang Bombo Radyo kay Wennie Sancho, dako ang importansya sang kuryente sa komunidad kag kalabanan sa mga konsumedores nagareklamo nga nagasaka ang balayran apang wala naka-intindi kun ano ang rason sini.
Suno diri, ang EPMC wala nagakontra sa Energy Regulatory Commission (ERC) kag luyag lamang nila nga proteksyonan ang mga konsumedores.
Dugang pa sini, ini ang ila tikang agud malikawan ang market power abuse nga nagapadugang sa kabudlayan sang tawo kadungan sa pagsaka sang presyo sang bugas, kalamay, plete kag iban pa nga balaklon.
Sa karun, suno kay Sancho, local lamang ang EPMC nga ipatukod bangod nakahibalo man ini nga indi ini masapakan kun ideretso sa national.
