Nagapanawagan ang secretary general sang Alliance of Concerned Teachers-Negros Occidental sa tanan nga luyag magbulig kag magdonate sang mahimo gamiton sa Brigada Eskwela bangud ini ang wala madala sa budget.
Sa interview sang Bombo Radyo Bacolod kay Grace Abellar bangud nagahilapit na ang pagbukas sang klase, magaumpisa naman ang Brigada Eskwela gani nagapanawagan ini sa may luyag nga magdonate kaangay sang pinta kag iban pa nga mga galamiton sa pagpanglimpyo.
Suno kay Abellar, wala nadala ang pagbakal sang pinta kag iban pa sa Maintenance and Other Operating Expenses (MOOE).
Nahibaluan nga sa karun nagapadayon na ang enrollment kag sa madason nga semana magapatigayon na sang Brigada Eskwela antes ang pag-umpisa sang klase.
Nagapangabay man si Abellar sa bag-o nga Education Secretary Sonny Angara nga mahatagan man sang atensyon ang pagdugang sang mga ginakulang nga classrooms para sa mga kabataan.
Kasubong man mapamaayo ang mga ventilation sang mga classrooms.
