Mas pabor ang secretary general sang Alliance of Concerned Teachers – Negros Occidental nga dulaon na lang ang K to 12 program sa pungsod.
Sa interview sang Bombo Radyo Bacolod kay Grace Abellar, mas maayo nga dulaon na lang ang K to 12 program bangod indi indi ini practical sa pungsod ilabi na sa mga kabataan kag mga ginikanan.
Suno diri, mas nagdugang pa ang gasto kag delay sa mga pagraduate sang mga bata.
Paathag sini, indi kaangay ang Pilipinas sa iban nga pungsod nga kun ang bata nakatapos sa Senior High School makasarang na ini makakita sang trabaho.
Diri sa Pilipinas mas ginakilala sa gihapon kun sin-o ang nakagradwar sa kolehiyo.
Indi man dapat makulbaan ang mga manunudlo kun madula ang K-12 bangod madamo sang hiring sa Department of Education (DepEd).
Pahayag ni Abellar, kun dulaon gid man ang K-12 dapat dulaon ini sang matuod-tuod kag indi lang nga panuboon ang strand.
Mas maayo pa gid suno kay Abellar nga gamiton na lang ang budget sa senior high school sa mga scholarships sang gobyerno.
