Gin-athag sang tagpamaba sa Negros Occidental Police Provincial Office nga ang kadamuon sang police personnel ang nakadepende sa populasyon sa kada banwa ukon ciudad.
Ini kasunod sang paggamit nga halimbawa sang mga kapulisan kag militar nga nagagwardiya lamang sa mga kampo ukon estasyon ni Senate President Francis “Chiz” Escudero sa ginaduso nga Senate Bill No. 890 ukon ang Rightsizing Bill, nga magapalos sa mga redundant positions sa mga government offices.
Suno diri, wala nagakatuman ang ila nga nagakadapat nga function kag nagaserbe na lamang nga tagabukas sang gate.
Sa interview sang Bombo Radyo Bacolod kay NOCPPO Spokesperson Police Captain Judesses Catalogo, ang mga kapulisan sa lower units ang nagasunod lamang sa kun ano ang mandato sang Philippine National Police (PNP) National Headquarters.
Apang paathag sini nga yara man sa layi ang ideal operation ratio sang mga kapulisan sa kada banwa ukon ciudad, nga 1:500 ukon isa ka pulis sa kada 500 ka pumuluyo.
Ang nasambitan nga ratio ang nakita nga nagakadapat nga numero sang kapulisan agud indi mabudlayan sa pag-implementar sang layi.
Sa karun, ang police personnel sa NOCPPO ang kulang pa sa numero sang populasyon.
Sa pihak nga bahin, indi lamang ang mga kapulisan nga yara sa field ang importante, bangod ang mga ini ang ginahatagan man sang nanarisari nga role nga nagabulig sa pagpatuman sang peace and order mandate sang kapulisan.
Kalakip na diri ang foot patrol, mga nagaroving gamit ang patrol car, mga nagaserbe nga security sa mga events kasubong man ang mga personnel nga nagabantay sa mga base camp ukon estasyon.
Suno kay Catalogo, mahimo nga makompromiso ang security, operation kag personnel kun bisan sin-o lamang ang makasulod kag wala sang pulis nga nagabantay sa gate.
