Naaresto ang gina-alegar lider sang Alpha Omeha, ang armado nga grupo nga nagpanulong kag nangagaw sang duta sa Molocaboc Island sa ciudad sang Sagay sang Oktobre 2024, matapos ginserbihan sang warrant of arrest sa kaso nga syndicated estafa sa Sitio Sammbulong 2, Barangay Mabini, Escalante City.
Ang subject ang ginkilala nga si Je-Ar Mahilum Escares, 36 anyos, single, residente sang Sitio Bangkal, Brgy Jonobjonob, Escalante City.
Ang warrant of arrest sa 6 counts sang Syndicated Estafa ukon pagbayolar sa Republic Act 10951, ang ginpagwa sang Regional Trial Court Branch 57 San Carlos City sang Pebrero 10, 2025, kag ini ang wala sang bail.
Sa interview sang Bombo Radyo Bacolod kay Police Regional Office – Negros Island Region Spokesperson Police Lt. Col. Joem Malong, ang Regional Mobile Force Battalion sang NIR ang nagserbe sang warrant of arrest.
Suno diri, sila ang wala pagid sang detalyado nga impormasyon sa detalye sang kaso sang suspect, apang ginkumpirmar sang hepe sang Sagay City Police Station nga si Escares amo ang lider sang 22 ka mga armado nga persona nga nagpakilala nga Alpha Omega kag ginsulod kag gintuyo nga agawon ang propedad sang Lumayno family sa Molocaboc Island.
Ginaklaro naman nga ang grupo ang indi konektado sa fraternity nga Alpha Phi Omega.
