Ginserbehan sang notice of violation ang AMA Computer College kahapon sang hapon matapos matukiban nga wala sang business permit.
Suno kay Mayor Greg Gasataya, sang tuig 2021 kag 2022 wala nakaproseso sang business permit ang buluthuan apang nahimo nila nga makarenew sang permit sang tuig 2023 tubtob 2025 apang subong nga tuig wala pa sila sang permit kag pending sa gihapon ang ila status.
Suno sa alkalde, pila ka mga ginikanan sang mga Senior High School ang nagpadulong sa city government para mangayo sang abiso matapos nga 98 ka estudyante ang wala ginpahanugotan nga makatambong sa graduation.
Nag-apelar ang city government nga ilakip sa graduation ceremony ang mga estudyante kag mahimo nga ihold lamang ang ila mga documents kun wala pa sila nakabayad sang ila mga balayran apang natapos ang graduation nga wala ginlakip ang 98 ka estudyante.
Samtang, may yara man sang gin-issue nga separado nga notice of violation gikan sa DepEd Division of Bacolod kag gintiguyan na sang alaklde sa DepEd kun ano ang nagakadapat nga rules kag regulations nga sundon sang buluthuan.
