Pilason ang amay kag ang isa ka tuig nga bata matapos ginlabo sang utod sang kalive-in sa Purok 1, Barangay Isio, Cauayan, Negros Occidental sang Marso 29, 2025.
Ginkilala ang napilasan nga amay kay Rey Belnas, 36 anyos, laborer kag residente sang nasambit nga lugar.
Samtang ang suspetsado ang ginkilala kay James Gelvero, 42 anyos, kasado kag residente man sang nasambit nga lugar.
Sa interview sang Bombo Radyo Bacolod kay Police Lt. Col. Lowell Garinganao, hepe sang Cauayan Municipal Police Station may nagluntad nga paglalisay sa tunga ni Rey kag sang ka-live in sini nga si Michelle Gelvero.
Apang bangud nagasuprer si Michell sang high blood nadulaan ini sang pangalibutan.
Sa kakulba ginkugos ni Rey ang isa ka tuig nga bata kag magapangayo kuntani sang bulig sa suspek apang wala sang madamo nga estorya, hinali lamang ang mga ini ginpanglabo gamit ang espading.
Matapos ang insidente gilayon man nga nagpalagyo ang suspek sa wala mahibaluan nga direksyon.
Nakaangkon sang pilas sa tiil si Rey kag ang isa ka tuig nga bata nga gindala man sa ospital.
Nagapadayon sa karun ang imbestigasyon sang Cauayan Municipal Police Station sa insidente.
