Nagdangop sa Bombo Radyo Bacolod ang isa ka amay matapos ang nabatun nga abiso gikan kay Barangay Taculing Punong Barangay Lady Gles Gonzales Pallen nga idemolish ang balay sang iya kabataan apang wala sang natalana nga relocation.
Sa interview sang Bombo Radyo Bacolod kay Rudy Sante, pito sa iya siyam ka kabataan ang nagapuyo sa kilid sang Magsungay River sa Purok Paglaom, Barangay Taculing, Bacolod City upod sa iya asawa.
Suno diri 14 ka tuig na sila nga bulagay sang asawa, apang padayun ang kumunikasyon sini sa iya kabataan, nga nagpatukod sang apat ka balay kag 10 ka tuig na nga nagapuyo sa lugar.
Ang ila balay ang nahamtang sa kilid lamang sang pika-pika sang suba nga gindeklarar nga danger zone.
Sa nasambitan nga suba man nakadanlog kag napatay ang 4 anyos nga si James Ernaez kadungan sang pag-ulan ulan sang tinalikdan nga semana.
Suno sa kabataan sini, sila ang ginpadulungan sang Punong Barangay agud pahibaluon nga idemolish ang ila balay sa Oktobre.
Apang ginakwestyon sini ang pahayag ni Pallen nga wala sang natalana nga relocation, gani wala man sang mapuy-an ang iya kabataan.
Gin-abiso sini sa iya kabataan nga indi gid maghalin tubtob wala sang mahatag nga relocation para sa ila.
