Arestado ang amay nga suspetsado sa paghimulos sa kaugalingon niya nga anak sa Murcia, Negros Occidental paagi sa joint operation sang Murcia Municipal Police Station kag Negros Occidental Provincial Police Office-Provincial Mobile Force Company (NOCPPO-PFMC) sa sulod sang manokan sa Sitio Riverside, Barangay Talotog, Murcia.
Sa interview sang Bombo Radyo Bacolod kay Police Lt. John Paul Tabujara, hepe sang Murcia Municipal Police Station, ang arestado nga si Rolando Masangkay, 50-anyos, ang nagapangatubang sang kaso nga rape kag number 2 most wanted person sa Murcia.
Suno kay Tabujara, madugay na nila nga ginapangita ang suspetsado matapos nga ginpasakaan ini sang kaso sang biktima nga iya mismo nga anak.
Suno sa hepe, makapila na ka beses nga ginhimuslan sang suspetsado ang iya mismo nga anak bangud ang iya asawa ang yara sa luwas sang pungsod nagatrabaho.
Apang sang nagpauli ang asawa sang suspetsado, gilayon ini nga ginpasakaan sang kaso matapos nga makahibalo ang misis nga ginhimuslan ang ila anak sang makapila ka beses.
Nakahunong na ang suspetsado sa custodial facility sa Murcia Municipal Police Station kag nagapangatubang sang two counts of rape kag non-bailable ang kaso.
