Napasakaan na sang kaso nga parricide ang amay nga naglabo sa apat ka tuig sini nga bata nga lalaki sa Purok Lucay 2, Barangay Camingawan, Kabankalan City, sang Biyernes.
Sa interview sang Bombo Radyo kay Police Senior Master Sergeant Reylan Serfino, chief investigator sang Kabankalan City Police Station, kapin alas- 12:00 sang udto, nagapanyaga ang amay nga ginkilala nga si Chalier Laurente, 48 anyos, laborer, upod ang tatlo sini ka kabataan nga mga naga-edad 23 anyos, 12 anyos kag ang agot nga apat ka tuig nga bata.
Suno diri, matapos ang panyaga, nagsulod ang subang sa ila nga kwarto samtang gintawag naman sang amay ang 12 anyos nga bata sini agud magpamasahe.
Wala man ini naakig sa bata apang sa wala nahibaluan nga rason, nagtindog ang amay kag nanira sang pirtahan kag nagkuha sang binangon.
Nabatian sang subang nga nagahilibion ang duha sini ka manghod kag ini naggwa agud tsekyaron ang natabo.
Nakita sini nga may binangon ang iya amay kag gintnguhaan nga kuhaon apang wala sini nahimo.
Samtang ang 12 anyos naman ang nagdalagan sa ila nga kwarto kag naglumpat sa bintana kag amo nga nakapalagyo.
Ginbuno kag ginlabo-labo sang amay sa nagkalainlain nga bahin sang lawas ang agot sini nga bata.
Ginpahayag nga antes ginbuhat ang krimen, ang amay ang nagbuya pa sang tinaga nga “balunon ta kamo”.
Ang bata ang gindala pa sa ospital apang gindekalarar nga dead on arrival.
Pahayag ni Serfino, sang Pebrero 16, 2021, sang ginlampusan man sang suspetsado sang martilyo sa ulo ang iya nga asawa nga gintunaan sang kamatayon sini bangod sa gina-alegar sini nga siya ang nangimon, apang sadto wala ini natigayon nga mapreso.
Sa karun, desidido na ang utod sang suspetsado nga pasakaan ini sang kaso nga parricide.
Samtang ang duha naman ka kabataan ang yara sa kustodiya sa utod sang ila amay.
