May-ara na sang ginadudahan ang amay sang 17 anyos nga nasapwan patay sa kahilamunan nga bahin sang Barangay 12, Bacolod City sa mahimo may kahimuan sang krimen.
Madumduman nga nasapwan kahapon sang hapon ang bangkay ni Freya Go, 17 anyos nga nakabaklid, may gapos ang kamot kag wala na sang pang-idalom nga panapton.
Sa interview sang Bombo Radyo Bacolod kay Alyas Chel, lola sang biktima, 2023 sang ulihi sila nga nakaupdanay sang iya apo sang siya ang nagpauli gikan sa Estados Unidos.
Pahayag sini nga 7 anyos pa lamang si Freya sang nagbulagay ang iya mga ginikanan kag ini ang wala gid makatapak sa high school.
Gintanyagan man sini sadto ang apo nga mag-upod na lamang sa iya apang ini ang nagbalibad sa kahangawa nga gamuhon sang iya iloy ang lola bangod sila ang wala nagahangpanay.
Naluoy man ini sa iya apo bangod makita gid nga kulang ini sa pagpalangga.
Suno sa lola, may kahagugma sadto nga 36 anyos sa La Carlota City ang iya apo sang ini ang 14 anyos pa lamang.
Apang ang lalaki ang sa karun may pamilya na matapos may napabusong nga lain nga babayi.
Suno diri, ginparehab man sadto sang iloy ang dalagita bangod sa trauma bangod sa gina-alegar nga ini ang ginhimuslan.
Apang nagpalagyo sa rehabilitation center ang bata kag nagkadto sa iya.
Subong nga 2025, nagcontact sa iya ang amay sang bata agud magpanugid nga ini ang nagapasaway naman matapos maglive-in sa isa ka lesbian.
Indi man segurado sang lola kun sila pa sa gihapon sang lesbian nga residente sang Brgy Banago.
Apang sa impormasyon sang Bombo News Team, si Freya ang isahanon nga nagaboard sa bahin sang Gatuslao Street kag trainee sa negosyo nga nagabaligya sang construction supplies.
Luyag sang lola nga ma-imbestigaran man ang mga anay kahagugma sang dalagita.
Ginpanugyan naman sini sa amay nga magkooperar na lamang sa kapulisan.
Suno sa lola, may ara na sang mga ginadudahan ang amay sang bata nga mahimo may kahimuan sang krimen.
