Nagkadto na ang amay ni Freya Mae Go sa punerarya kag nagakoordinar naman sa kapulisan.
Madumduman nga nasapwan kahapon sang hapon ang bangkay ni Freya Go, 17 anyos nga nakabaklid, may gapos ang kamot kag wala na sang pang-idalom nga panapton.
Sini nga hapon, nagpadulong na ang amay nga si Joselito Go sa punerarya apang wala nagpa-interview sa media kag nagpahayag nga luyag sang privacy.
Sa interview sang Bombo Radyo Bacolod kag Police Captain Francis Depasucat, station commander sang Bacolod Police Station 1, antes paman una na nga ginlab-ot sang ila imbestigador ang amay kag ini ang nagkomiter nga maga-atubang sa kapulisan.
Pahayag sini nga importante ang statement sang amay, bangod ini ang mahimo may mahatag pa nga importante nga impormasyon nga makabulig sa pagsolbar sang kaso.
Una naman nila nga na-estorya ang iloy nga nagsugot nga mapaidalom sa autopsy ang bangkay.
Apang sa karun ginahulat pa nila ang availability sang doktor nga magapatigayon sang autopsy examination.
Sa karun, padayun ang pagtipon sang Bacolod Police Station 1 sang mga CCTV footage, kag mas nagdamo na ang ila backtrack area.
Nagalaom ini nga magakooperar man ang mga tag-iya sang mga CCTV agud mahatagan sang hustisya ang pagpatay sa dalagita.
Ang biktima ang may mga pilas man sa iya nawong kag mga lagob sa lawas, apang wala sang may nakita nga pilas tuga sang pagpamuno ukon igo sang bala.
Sa pihak nga bahin ang higot sa iya kamot ang konektado sa nakahigot sa iya liog gani kun siya ang magapamiyersa nga makuha ang gapos, magahugot man ang pagkakuha sa iya liog.
