Ginpasakaan sang kaso nga Parricide kag Republic Act 9165 ukon Comprehensive Dangerous Drugs Act of 2002 ang 21 anyos nga bata matapos ginbuno-patay ang iya kaugalingon nga amay sa banwa sang La Castellana.
Ang biktima ang ginkilala nga si Rolando Mosquera Sr., 53 anyos, residente sang Sitio Malino, Hacienda Bacsay, Barangay Robles, La Castellana, Negros Occidental; samtang ang suspect ang iya man mismo Junior nga 21 anyos.
Sa interview sang Bombo Radyo Bacolod kay Police Major Rhojn Darell Nigos, hepe sang La Castellana Municipal Police Station, ang bata ang wala pa ma-isahan ka tuig sang makabalik sa banwa matapos magtrabaho sa Bicol.
Una na nga nagbaisay ang mag-amay antes natabo ang krimen sang Martes, Oktubre 29.
Sa imbestigasyon, may-ara sang duta nga ginkutkot ang amay sa ugsaran sang ila nga balay, kag suno sa asawa, ini ang tamnan kuntani sang saging.
Apang nagpinsar ang bata nga nagkutkot ang amay sang duta agud siya ang ilubong nga buhi, gani sa pagsulod pa lamang sa piyertahan sang amay, ini ang iya ginsugata sang kutsilyo.
Ang amay ang nakaangkon sang samad sa idalom nga bahin sang dughan nga gintunaan sang iya kamatayon.
Gilayon naman nga nagpatigayon sang hot pursuit operation ang kapulisan kag nadakpan ang suspect.
Sa pagkadakop, nakuha sa paghinakop sini ang kutsilyo nga gingamit sa pagpatay upod sa tagob sini, ba-iran, isa ka sachet sang suspected shabu, duha ka lighter kag green nga kurtina nga may dugo.
Suno kay Nigos, ang suspect ang wala sa drugs watchlist sang kapulisan kag Barangay kag ginalantaw nga nakatuon sa paggamit sang droga sa Bicol.
Desidido naman ang iloy nga magpasaka sang kaso.
