Patay ang 53 anyos nga amay matapos ginluthang sa Purok Saging, Sitio Abtao, Barangay Tapi, Kabankalan City, Negros Occidental sang Sabado sang gab-i.
Ginkilala ang biktima kay alyas Jerry kag residente man sa nasambit nga lugar.
Sa interview sang Bombo Radyo Bacolod kay Police Captain Sammy Gasataya, Deputy Chief of Police sang Kabankalan City Police Station, ang biktima kag ang umagad sini ang naga-inum sang makahulubog nga ilimnon sa atubang sang balay sini sang gilayon nga gintiro sang tatlo ka mga wala matumod nga persona.
Suno kay Gasataya ang asawa sang biktima, ang bata kag ang umagad sini ang ginpahapa sang mga suspetsado kag ginpaandaman nga sila ang tiruhon kun maghulag.
Suno diri, ginpahayag sang umagad sang biktima nga napanilagan sang mga ini nga ginsulod sang suspek ang balay apang wala nakita ang ila nga ginapangita kag naglibot sa balay sang biktima kag didto na nabatian ang lupok sang armas luthang.
Matapos ang insidente nagpalagyo gilayon ang mga suspek.
Nakaangkon sang patal nga pilas sa ulo ang biktima, nga gintunaan sang iya kamatayon.
