Patay ang isa ka amay matapos ginsumbag sang iya kaugalingon nga bata sa Purok Bagacay, Barangay Cayhagan, Sipalay City alas-7:00 sang gab-i, Septyembre 6.
Ginkilala ang biktima nga si alyas Lando, 57-anyos samtang ang bata sini amo si alyas Azel, 29-anyos lunsay mga residente sang nasambit nga lugar.
Sa interview sang Bombo Radyo kay Negros Occidental Police Provincial Office (NOCPPO) Spokesperson Police Major Judesses Catalogo, ginsaway sang bata ang iya amay nga yara sa impluwensya sang makahulubog nga ilimnon bangud ini ang nagapalupok sang pwitis.
Bangud sini, nagpangakig si Lando kag lampusan kuntani sini sang kahoy ang iya bata.
Apang gin-unahan na sumbag ni alyas Azel sang makaduha ka beses ang iya amay gani ini ang natumba kag na-igo sa bato ang ulo.
Ginhingagaw pa dala sa ospital ang biktima apang gindeklarar nga dead on arrival.
