Ginkilala sang isa ka amay nga iya bata ang isa sa mga bangkay nga napatay sa engkwentro sa tunga sang NPA kag miyembro sang 62nd Infantry Battalion sa Barangay Quintin Remo, Moises Padilla, Negros Occidental.
Yara na sa karun sa Nalagon Funeral home ang lima ka bangkay, kun sa diin ginalakipan sang apat ka mga lalaki kag isa ang babayi.
Sa interview sang Bombo Radyo kay Samuel Montanez residente sang Barangay Quintin Remo, Moises Padilla, ginpahayag sini nga may isa ka amay nga nagkilala sa isa ka lalaki nga napatay sa engkwentro nga anak niya ini samtang ang babayi naman ang live-in partner sang iya bata.
Suno diri, ang lalaki amo si Alyas “Dayok” nga nagtrabaho sa Cebu kag nakilala niya didto ang babayi.
Ang duha kuntani ang nagatipon sang kwarta agud nga magpakasal.
Sa nakita sini normal lang man ang pangabuhi sang duha, apang aminado man ini nga wala siya nakahibalo sang matuod nga pangabuhian sang iya nga bata kag live-in partner sini.
Samtang ang iloy naman ni Dayok nga yara sa evacuation center, ang nalipongan sang nahibaluan sini nga napatay ang iya bata.
