BACOLOD CITY-Napasakaan na sang kaso ang amay nga nagbuno sang iya duha ka mga kabataan gamit ang gunting sa Purok Paraiso, Sitio Sibucao, Brgy. Banago ciudad sang Bacolod naligad nga Mierkoles.
Mismo si Cherylou Laruan, ang misis sang suspetsado nga si Elmer ang nagduso nga mapasakaan sang kaso nga frustrated homicide ang iya mister kahapon.
Suno kay Cherylou wala na sila nag-istorya sang iya mister nga priso karun sa Police Station 3 sang ila ini ginpasakaan sang kaso.
Samtang nakaguwa naman sa hospital ang ila kabataan nga naga-edad sang 2 kag 3-anyos nga nakaangkun sang mga pilas sa liog matapos ginbuno sang ila amay.
Samtang, naghatag man sang bulig pinansyal ang mga opisyal sang Brgy. Banago sa pamilya Laruan.
Suno kay Punong Barangay Ricky Mejares, ila gintinguhaan nga malibre ang pagpabulong sang mga biktima sa Corazon Locsin Montelibano Memorial Regional Hospital kag ginhatagan man nila sang groceries ang pamilya Laruan.
