Patay ang duha ka menor de edad nga mga babayi matapos ginluthang sang ila kaugalingon nga amay nga nag-utas man sang kaugalingon sini nga kabuhi sa Brgy Buntis, Bacong, Negros Oriental, kahapon alas-8:00 sang aga.
Sa interview sang Bombo Radyo kay Negros Oriental Police Provincial Office (NORPPO) Spokesperson Police Lt. Stephen Polinar, ang suspek ang nagatrabaho bilang security guard.
Suno diri, bulagay ang suspek kag ang asawa sini apang nagpadulong ini sa balay sang iya asawa sa luyag sini nga siya ang madul-ong sa ila kabataan nga naga-edad sang tatlo kag lima ka tuig pakadto sa eskwelahan.
Apang wala nagpasugot ang iloy kag nagka-argumento ang duha.
Naggabot sang armas-luthang ang suspek kag gintayaan ang iloy apang nakapalagyo ini samtang nabilin naman ang duha ka bata.
Gintiro sang amay ang iya duha ka bata kag kasunod sini gintiro niya man ang iya kaugalingon.
Narekober sa area ang calibre 9 mm pistol samtang padayon pa ang imbestigasyon sang kapulisan sa nagluntad nga krimen.
