Tul-an nalang sang masapwan ang isa ka amay nga namissing anom ka bulan na ang nakaligad sa syudad sang Kabankalan, Negros Occidental, samtang nag-ako naman nga may kahimuan sang krimen ang kaugalingon sini nga anak.
Suno kay P/Lt Col. Raymond Cruz, hepe sang Kabankalan City Police Station ang biktima ang ginkilala kay Leonardo Benigay, 50 anyos.
Pahayag sang hepe nga nakabatun ang mga ini sang tawag nga may nasapwan nga kalansay sa Purok Badyang, Barangay Camingawan, Kabankalan City.
Nahibaluan nga anom ka bulan na nga ginapangita sang pamilya ang biktima matapos hinali nalang nga madula.
Tubtob sa makutkutan sang pamilya ang kaangay nga trapal kag sang ginsegi ang pagkutkot, didto na kag nasapwan ang kalansay.
Pahayag pa sang utod sang biktima nga si Victor Benigay, nga kasunod sang pagkadiskubre sa bangkay, gilayon man nga nag-ako ang bata sini nga ginkilala kay Michael Benigay, 25 anyos nga siya ang nagpatay sa iya amay pinaagi sa pagmartilyo sang ulo sini.
Suno kay Cruz, ginapahayag sang suspetsado nga nadulaan sadto sang kwarta ang ila amay kag sila nga mag-ulutod ang ginapasibangdan nga nagkuha.
Bangod sa kaakig, ginkastigo sini ang iya nga bata.
Gani sang nakakita sang kahigayunan ang suspetsado kag nakakapot sang martilyo nga gilayon man sini nga ginhan-os sa ulo sang amay nga gintunaan sang gilayon nga kamatayon.
Nakitaan man sang crack sa bagol sang biktima kag kaupod nga ginlubong ang martilyo.
Apang kadungan sa pagconfess sang bata sa krimen, gilayon man ini nga gindala sa ospital bangod nauna na ini nga nag-inom sang pesticide.
Sa karun, padayun pa nga ginabulong si Michael Benigay sa ospital.
Sa karun, ginahulat pa sang kapulisan kun magapasaka sang kaso ang pamilya sang biktima batok sa iya nga anak.
Suno kay Cruz, Parricide ang mahimo pangatubangon nga kaso sang suspetsado.
