Patay ang isa ka amay matapos nga ginhatok-hatok labo kag gintutdan sang iya mismo nga bata sa Barangay Mamburao, Pamplona, Negros Oriental sang nagligad nga Agosto 9.
Sa interview sang Bombo Radyo Bacolod kay P/Capt. Luciano Kinilitan, chief investigator sang Pamplona Municipal Police Station, ginkilala ang biktima nga si Pedro Regala, 78-anyos.
Suno kay Kinilitan, may deperensya sa paminsaron ang suspetsado nga si Solini Regala.
Santo sa imbestigasyon sang kapulisan, pakadto sa iya kalubihan si Luciano agud magpanglimpyo sang naglabay ini sa puluy-an ni Solini nga didto man nahamtang sa kalubihan.
Nagsabtanay ang duwa tubtob nga nag-komprontahanay ang mga ini sang hinali lang nga ginlabo sang suspetsado ang iya amay gamit ang sundang sa nagkalain-lain nga bahin sang lawas sini.
Nagligid pa sa banglid ang lawas ni Pedro.
Wala pa gid na kuntento ang suspetsado kag iya ini gintampukan sang mga lukay kag gintutdan.
Nasunog ang pila ka porsyon sang lawas sang biktima.
Gilayon naman nga gin-aresto si Solini matapos nga nahibaluan sang kapulisan ang natabo.
Kaso nga parricide ang ginahanda na sa karon sang Pamplona PNP nga ipasaka batok sa suspetsado.
