Patay ang isa ka amay nga masami nagapanakit sang iya mga kabataan matapos gintiro sang iya 8-anyos nga agot sa Sipalay City, Negros Occidental.
Sa interview sang Bombo Radyo Bacolod kay Police Lt. Col. Necerato Sabando, hepe sang Sipalay City Police Station, dead on the spot ang 39-anyos nga si Jessy Obas sang Purok Manluy-a, Brgy. San Jose matapos nga gintiro sang iya anak nga lalaki kahapon.
Antes ang krimen, gintindakan sang amay ang iya anak sa baba kag ginsumbag.
Ginkuha sang 8-anyos ang .38 caliber revolver sang iya amay kag gintiro ang biktima sa dughan sang makapila ka beses gani gilayon ini nga napatay.
Santo sa imbestigasyon sang mga pulis, masami nga hubog ang biktima kag ginasakit sini ang iya mga kabataan.
Sang matabo ang krimen, hubog man si Obas.
Ang biktima ang may tatlo ka kabataan nga lunsay mga lalaki.
Suno sa agot nga yara subong sa kustodiya sang Department of Social Welfare and Development, akig ini sa iya nga amay bangud sa iya batasan gani iya nga gintiro.
Nagagwa man sa imbestigasyon nga gintudluan sang biktima ang iya mga anak kun paano gamiton ang iya armas gani nakahibalo ang agot kun paano magpalupok.
Ang misis sang biktima ang nagatrabaho subong sa Manila gani sila lang nga apat ang upod sa balay.
