Ginpahayag sang amay sang ginluthang nga 20 anyos nga Grade 11 student sa Granada ville, Barangay Granada, Bacolod City, nga nakabatyag sila sang kakulba matapos nga may isa ka nakamotorsiklo nga nagalibot pabalik-balik sa area.
Madumduman nga ang biktima nga si Nicus Balagusa ang ginluthang patay sang suspetsado nga si Carlito “Dondon” Tongho sang Hunyo 2 sang gab-i.
Sa interview sang Bombo Radyo Bacolod kay Eric Balagusa, amay sang biktima, sang nakaligad nga inadlaw may yara sang nakamotorsiklo nga tawo nga nagalibot-libot sa area kag sang ginpamangkot sang gwardya kun diin ini makadto nagtabok lamang ini sa dalan kag sang ginpalapitan pa gid, ini ang nagderetso na lakat.
Apang, kampante naman ang pamilya bangod sa presensya sang nakastand-by nga police.
Sa karun, padayon ini sa gihapon nga nagapanawagan sa mga suspetsado nga magsungka.
Dugang pa sini, wala na sila sang kaakig pa apang luyag gid lamang nila sang hustisya.
Samtang, nagakasubo man ang mga abyan ni Nicus bangod nga mabuot nga klase sang tawo ang pagkilala nila kay Nicus.
Suno kay Rico Vallejo, madugay na sila nga mag-abyan ni Nicus kag para sa iya mabuot, maatipanon kag maayo ini nga migo.
Suno diri, sang siya ginpahibalo sa natabo kay Nicus, gilayon ini nga nagpadulong sa ospital kag naghilibion na lamang.
Samtang, sa Lunes iga-file ang kaso batok sa mga suspetsado kag natalana nga dal-on si Nicus sa ulihi nga palahuwayan sini sa Hunyo 12.
