Nagapanawagan ang amay sang 13 anyos nga bata nga nagabaligya sang kakanin nga nabungguan sang Toyota Fortuner sa dalan Lacson sa ciudad sang Bacolod sa nakabunggo nga kuntani masaylo ang iya bata sa pribado nga ospital agud madasig ang recovery sini.
Sa interview sang Bombo Radyo Bacolod kay Elmer Aguilar, amay sang nabungguan nag bata, isa ka Public Utility Jeepney Driver, ang bata sini ang nagapabilin sa Corazon Locsin Montelibano Memorial Regional Hospital kag padayon nga ginabulong.
Suno kay Elmer, ginhambalan sila sang nakabunggo sa ila bata nga irefund ang tanan nga bulong nga ginbakal para sa bata.
Ginpahayag man sini nga ang bata ang nagareklamo sang kasakit sang ulo kag makita sa ct scan nga daw may nagclog nga dugo.
Suno sa amay nagapanawagan sila nga masaylo sa pribado nga hospital ang ila anak agud nga madasig ang pag-ayo bangud sa ulo ang samad sini kag nagakahangawa sila nga kun ano pa ang matabo sa bata kun madugayan ang pag-ayo sini.
Ang bata ang nagbaligya sang kakanin antes pa man ini nga mabungguan agud nga may pangdugang nga gastuson sa ila nga Christmas party.
Samtang makita sa blotter report nga ang pangalan sang tag-iya sang salakyan nga nakabunggo diri ang certain Roy Yanson kag ginpahayag man sang driver sang salakyan nga kaupod sini ang iya boss sa salakyan sang nabungguan ang bata.
May nahatag naman nga financial assistance ang nakabunggo sa bata apang nagaayo ang amay nga kuntani isaylo sa private hospital para sa madasig nga recovery.
