Nagapanawagan ang amay sang isa ka hazing victim sa mga fraternity kag sorority nga untaton na ang ini nga buluhaton.
Sa interview sang Bombo Radyo kay Aurelio Cesar Servando, amay ni Guillo Servando nga napatay man sa hazing sang Tau Gamma Phi sang 2014, napanawagan ini nga untaton na ang hazing matapos nasapwan ang isa ka chemical engineering student sang Adamson University nga ginlubong sa isa ka bakante nga lote sa Imus, Cavite.
Si John Matthew Saliling ang namissing sang Pebrero 18 kag ulihi nga nakit-an nga padulong sa Laguna para sa initiation sini sa Tau Gamma Phi fraternity.
Sang damlag lang, nakit-an ang bangkay sang 24-anyos nga estudyante sa isa ka bakante nga lote sa Imus, Cavite nga madamo sang pasa tuga sang pagpangkastigo.
Una na nga ginpahayag sang isa ka witness sa kapulisan nga 70 ka beses nga ginkastigo si Salilig.
Sa interview sang Bombo Radyo kay Aurelio Cesar Servando, nagapanawagan ini sa mga founders sang Tau Gamma Phi fraternity nga tumanon ang ila promisa sadto nga untaton na ang practice sang hazing sang napatay ang iya bata sang 2014.
Suno kay Servando, wala nila gintuman ang ila ginsaad kag nagpadayon sa gihapon sa ila practice.
Sang nabatian sini ang natabo kay Salilig, suno sa amay, daw gintampa ini kag daw kaangay nga liwat nga nagbalik ang mga kasakit sini sang tion nga nadula ang iya bata.
Nagapanugyan ini sa mga ginikanan nga mangin sensitibo sa ila mga kabataan bangud ang hazing ang masami nga nagadugay sang duha ka semana.
Suno sa iya, isa sa mga balantayan amu nga kun may pagbag-o sa pamatasan sang bata, permi nagapauli nga kapoy, wala nagasuksok sang shorts agud matago ang mga pasa kag daw masami nga may yara sang problema.
Nagapanawagan man ini sa mga senador, opisyal kag celebrities nga alumni sang mga fraternity nga magbulig sa pagpamatok sa hazing bangud samtang nagadugay nagalala na gid ang ila practice.
Bilang isa ka pribado nga citizen, wala na ini nagalaom sa layi bangud indi ini epektibo sa pungsod kag mas maayo nga ang mga pumuluyo mismo ang magtindog kag magpamatok sa hazing.
Nagapanawagan ini nga untaton na ang bayolente nga practice ilabi na sa Tau Gamma Phi bangud indi ini buluhaton sang isa ka tawo kundi sang isa ka sapat.
