Buka ang windshield sang isa ka taxi matapos nga ginsumbag sang amay sang isa ka doktora sa sulod sang compound sang Corazon Locsin Montelibano Memorial Regional Hospital (CLMMRH) kapin alas-6:30 sang Miyerkules sang gab-i.
Gilayon naman nga ginpablotter sang taxi driver ang insidente sa Bacolod Police Station 2.
Nagahulat sang pasahero nga gikan sa ospital ang taxi sang mag-abot ang Innova nga salakyan nga ginadala sang amay sang isa ka doktora.
Bangod indi mabuksan sang doktora ang piyertahan sang ila salakyan bangod nagabalabag ang taxi, ini ang gintuktok sang doktora.
Apang hinali na lamang nga naggwa sa salakyan ang amay kag gintapungol ang windshield sang taxi.
Suno sa taxi driver, ginabasol siya sang amay nga nabungguan sini ang doktora apang panindugan niya nga wala sang kamatuoran ang alegasyon kag witness man sini ang security guard sa ospital.
Bangod sa natabo, ginpanugyan nila nga maghulat na lamang sang kapulisan agud mahisugtan ang problema apang gilayon na lamang nga nagsakay sa salakyan ang amay sang doktora kag ini ang ginpadalagan.
Ginaproblemahan naman sang taxi driver bangod magluwas nga wala na ini makadayun sa pagbyahe siya ang may dugang pa nga galastuhan sa pagpakay-o sa nabuka nga windshield.
Nahibaluan nga gina-arkilahan lamang sang driver ang taxi.
Apisar nga may identity na ang Bacolod Police Station 2 sa doktora, wala anay ini ginhingadlan karun nga wala pa nila nakasugilanon ang ginareklamo.
