Tubtob sa karun, indi pa ma-estorya sang maayo ang amay sang On The Job Training (OJT) student nga isa sa napatay sa pagkahulog sang mini dump truck sa Sitio Orang, Brgy Kalamtukan, Bayawan City sang Pebrero 4.
Madumduman nga napatay sa aksidente ang driver nga si Egmedio Arnaiz kag mga sakay nga sanday Diomedes Canoy, Kervin Andog, Larry Llamos, Ronel Cabasag, Jonathan Hamor, Jovanie Babor kag Jonaryl Caguisa, lunsay mga empleyado sang City Agriculture Office – Engineering Division kag ang isa ka On the Job Training (OJT) engineering student nga si Warren Arceñas.
Si Warren ang duha ka semana pa lamang nga naga-OJT kag ini ang ginpaupod lamang bulos sa isa ka empleyado nga nagsakit ang tiyan.
Sa interview sang iloy sini nga si Mary Ann Arceñas, tuman gihapon ang kasakit nga nabatyagan sang ila nga pamilya partikular na sang amay.
Pahayag sini nga adlaw-adlaw nagahilibion ang amay, kag halos indi gihapon ma-estorya.
Wala man ini nag-upod sa punerarya kun diin gindala ang lawas bangod indi sini mabatas nga makita ang bangkay sang iya bata.
Suno sa iloy, ginatinguhaan pa sini nga makumbinser ang iya bana nga mag-estorya sa iya agud nga mapa-utwas sini ang kasakit nga iya nabatyagan.
Pahanumdom sini sa bana nga sila ang nasakitan man apang kinahanglan nila nga batunon ang natabo.
