Kaso nga homicide ang atubangon sang security guard nga nagpatay sa iya nga umagad paagi sa pagbuno sa Purok Tilapia, Barangay 3, Bacolod City, Domingo sang hapon, Hulyo 12.
Madumduman nga ginbuno ni Edwin Pendon si Leonora Billones Pendon sang nakita sini nga naghikog ang iya bata nga si Private First Class Erwin Pendon, active member sang 11th Infantry Battalion, sa ila mismo nga balay samtang sila ang nagabaisay.
Sa interview sang Bombo Radyo kay Ariel Billones, amay ni Leonora, ginpahayag sini nga wala pa nag-inaway ang iya bata kag si Erwin sang yara sila sa resort sa Brgy 1.
Suno diri, ang suldado ang nakainom sang makahulubog nga ilimnon apang indi ini hubog.
Suno diri, nag-una ang mag-asawa puli sa ila balay sa Brgy. 3 kag ginpahayag nga didto na sila nagbais.
Nagtambay si Billones sa gwa sang Bacolod Police Station 2 kag nakita sini ang iya apo nga nagdalagan padulong sa iya.
Nanugid ini nga nagpalupok sang armas si PFC Pendon.
Pagpadulong ni Billones sa balay sang iya bata kag umagad, nakibot na lamang ini nga madamo sang dugo sa salog kag nadala na sa ospital si Leonora.
Suno kay Billones, kuntani gin-istorya lang sang iya balayi ang iya bata bangud yara man lang ini sa sulod sang balay sang naga-inaway ang mag-asawa.
