Pabor ang amay sang suspek nga nagpatay kay Nicus Balagusa sa Granada Heights, Barangay Granada, Bacolod City nga magsungka ang iya bata kun maggwa na ang warrant of arrest batok sa iya.
Sa exclusive interview sang Bombo Radyo kay Carlito Tongho Sr, mabuot ang iya anak nga si Carlito “Dondon” Tongho Jr, gani ginkakibot sini ang pag-abot sang pulis sa ila nga balay kag ginpangita ang iya bata kag didto na lamang sini nahibaluan ang ginhimo nga pagpatay kay Balagusa.
Suno diri, wala ini sang contact sa iya anak bisan ang mga pamilya nila sa Mindanao ang ginpamangkot na sini kun yara didto ang iya bata apang negatibo.
Apang, wala naman ini ginakabalaka ni Carlito Sr bangod nga wala man ini sang may ginatago.
Ginpahayag man sini nga nakaagi na nga ginkastigo sang bata sini ang 17 kag 19 anyos nga mga suspetsado nga naghimulos sa 16 anyos nga apo sini.
Pagkastigo naman sa 17 kag 19 anyos, naggwa ang pangalan ni Nicus nga ginatudlo nga mastermind sa natabo, apang klaro nga wala ini nagtandog sa menor de edad, apang ginapatihan nga may ginbutang nga bulong sa ilimnon sang 16 anyos.
Kag suno sa 16 anyos, sadtong nagkadto sila sa birthday party, naga-inom inom ini kaupod ang iya mga abyan kag nakabugtaw na lamang ini nga wala sang panapton kag nagasakit ang pribado nga bahin sang iya lawas.
Pahayag ni Carlito Sr, dako ang posibilidad nga magasungka ang bata sini kun maggwa man ang duha ka mga suspetsado nga nagrape sa iya nga apo.
