Ginkumpirmar sang spokesperson sang Negros Occidental Police Provincial Office nga may yara sang isa ka mataas nga opisyal sang New People’s Army nga nagsungka sa Barangay Quintin Remo sa banwa sang Moises Padilla sang Hunyo 5.
Sa interview sang Bombo Radyo Bacolod kay Police Capt. Judesses Catalogo, isa lang ka babayi ang nagsurrender paagi sa Localized Peace Talks kun sa diin ang nagapamuno diri ang municipal mayor kag punong barangay.
Suno kay Catalogo, dako ang nangin kabahin ni Moises Padilla Municipal Mayor Ella Celestina Garcia-Yulo agud nga mamaterialize ang pagsungka sang nasambit nga rebelde.
Siya ang nagsurrender sa Moises Padilla Municipal Police Station kaupod ang allied units sang Armed Forces of the Philippines; Special Action Force kag Police Mobile Patrol Unit.
Ang nagsungka amo ang isa ka 30 anyos nga babayi kag gina-aligar nga secretary sang Central Negros 3 sang NPA kag siya man ang ginatudlo nga political instructor sang Central Negros 1 – Komiteng Rehiyon – Negros, Cebu, Bohol, Siquijor.
Gin-surrender man sini ang isa ka caliber .38 revolver, bala, granada, kag mga dokumento.
Wala pa gindisclose ang identity sini para man sa seguridad sini.
Ang pinakarason sang pagsungka sini ang realisasyon nga wala sang maayo nga padulungan ang pagpabilin sa makawala nga grupo.
Suno kay Catalogo, iproseso naman nila ang mga kinahanglanon agud nga makaavail sang proyekto sang gobyerno nga ginalakipan sang pagpaidalom sini sa evaluation sang Department of Social Welfare and Development (DSWD) agud mahibaluan kun ini ang miyembro gid sang makawala nga grupo.
Nagalaom man ang spokesperson sang NOCPPO nga matapos ang profiling sa labing madali nga tinion agud nga makaavail na ini sang programa sang gobyerno.
