Isa ka amazona ukon babayi nga hangaway sang New People’s Army ang nadakpan sang mga suldado kasunod sang engkwentro nga nagluntad sa Sitio Banwa Minatay, Brgy Marcelo, Calatrava, Negros Occidental kahapon sang udto.
Suno kay Brigadier General Inocencio Pasaporte, commander sang 303rd Infantry Brigade, pila ka mga miyembro sang rebelde nga grupo ang nasugata sang 79th Infantry Battalion sa lugar kag nagdugay sang 20 minutos ang bayluhanay sang lupok apang wala sang may napilasan sa bahin sang militar.
Nadakpan naman si Isabel Necesario alyas Ka Mylene nga deputy secretary sang North Negros Front apang ginaverify pa kun sa diin ini nagaistar sa northern Negros.
Narekober sa encounter site ang duha ka rifle grenade, duha ka caliber .38 kag mga bala kag pito ka mga cellphone kag iban pa nga subersibo nga mga dokyumento.
Natalupangdan sang mga suldado ang tinulo sang dugo apang madali lang ini nga napanas bangud sa madamol nga ulan.
Suno kay Pasaporte, ginalantaw nga high ranking official sang NPA si Necesario bangud nagagwa sa mga dokyumento nga luyag nila tukuron liwat ang North Negros Front.
Sa karon, nakahunong si Necesario sa Calatrava Municipal Police Station kag pasakaan sang kaso nga illegal possession of firearms and explosives.
