Nagpatigayon sang blessing kag commissioning ang Bacolod City Fire Station sa ambulansya nga gindonar sang Korean Fire Industry sa Barangay Villamonte sang Lunes.
Sa interview sang Bombo Radyo Bacolod kay Bureau of Fire Protection (BFP) Region 6 Director Fire Chief Superintendent Jerry Candido, halos kaangay man ang kapabilidad sang Hyundai Ambulance Angel 03 sa iban nga mga ambulansya, apang ang pinaka-importante nga bangod sa donasyon nadugangan ang ambulance fleet sang BFP-Bacolod.
Paathag ni Candido nga sa karun may tatlo na ka ambulansya nga naga-operate sa ciudad, kag ini ang madugangan pa sang ambulansya nga magagikan sa Bacolod City Government.
Suno sa regional director sang BFP, nga luyag nila maipakita sa publiko nga ang mga bombero ang indi na lamang karun para sa pagpalong sang kalayo, kundi nagaresponder na sa tanan nga sahi sang emerhensya.
Pahanumdom sini nga sa paglala sang climate change, makibot nalang nga ang mga lugar nga sadto wala ginabaha, karun ginabaha na kasubong man ang asod-asod nga mga pagtay-og nga nabatyagan sang Mindanao.
Suno kay Candido ang kaangay nga mga hitabo ang dapat handaan man sang ciudad.
Pahanumdom pa sini nga apisar may mga trained nga mga personnel ang mga fire station sa bilog nga Negros Occidental, ginakulang naman sa equipment.
Gani dako ang pagpasalamat sini sa Korean Fire Industry, kag ginalauman sini nga magasegisegi na ang pagdonar sang ambulansya kasubong man fire truck sa Western Visayas.
Suno diri, ang Bacolod City Fire Station ang may ginaprocure man sa karun nga panibag-o nga fire truck.
Sa pihak nga bahin, magadugang naman sang recruits ang BFP, kag pasalig ni Candido nga wala sang makatapos sa basic course nga wala maayo mapaidalum sa training sa tanan nga rescue operations.
Sa kabug-usan ang Korean Fire Industry ang nakadonar na sang nadonar nga 10 ka ambulansya sa BFP Region 6.
Kun sa diin lima diri ang gindetail sa Panay Island, samtang ang lima ang yara sa ciudad sang Bacolod, Silay kasubong man banwa sang EB Magalona, Cauayan kag San Enrique.
Gindumdom pa ni Candido nga isa ang San Enrique sa ginpadal-an bangod masami may nagaluntad nga sunog sa lugar kag sadto fire trucks pa ang ginakargahan sang mga pasyente.
Pinaagi sa mga panibag-o nga ambulansya, mas makaresponder sang maayo ang BFP.
