Patay ang driver sang ambulansya sang South Bacolod General Hospital samtang pilason ang tatlo ka sakay sini matapos mabungguan sang isa ka Montero Sport kag nagbunggo man sa isa ka delivery van sa area sang San Sebastian – Lacson Street, Bacolod City pasado ala una kahapon sang hapon.
Sa interview sang Bombo Radyo kay Police Major Jovil Sedel, hepe sang Bacolod Police Station 1, magadul-ong kuntani sang pasyente sa Corazon Locsin Montelibano Memorial Regional Hospital (CLMMRH) ang ambulansya sang hinali lang ini nga ginbungguan sang Mitsubishi Montero nga ginamaneho ni Kenny Arillo, 21 anyos kag residente sang Brgy. Alijis, Bacolod City nga magatabok kuntani sa dalan nagikan sa nakatungdan padulong nasidlangan.
Bangud diri, nagbalang-balang ang ambulansya kag nagbunggo sa isa ka JMC Van nga ginamaneho ni Genesis Graellos nagikan sa north padulong south.
Suno kay Sedel, ginhingagaw dala sa ospital ang driver nga si Jessie James Tranilla apang gindeklarar nga dead on arrival.
Pilason naman ang sakay sini nga nurse nga si Maria Cajeras, 30 anyos; auxillary nga si Jose Francisco III Sombero, 34 anyos; kag pasyente nga si Vicente Limaco, 78 anyos.
Sa karun suno kay Sedel, nakadetain ang driver sang Montero nga si Arillo samtang pending for investigation naman si Graellos.
Suno sa hepe, mahimo nga mangatubang si Arillo sang kaso nga Reckless Imprudence Resulting to Homicide, Multiply Injury kag Damage to Property.
