Nagaproseso na sang special permit ang mga ambulant vendors sa North Capitol Road sa kilid sang Negros Occidental Provincial Capitol Lagoon.
Sa interview sang Bombo Radyo Bacolod kay Bacolod City Administrator Atty Mark Steven Mayo, ini santo sa pag-implementar sang City Ordinance 1009 ukon Ambulant Vendor Ordinance.
Ini ang magahatag sang special permit sa pagbaligya sa North Capitol Road, sa limitado nga oras sa tion sang kagab-ihon.
Suno kay Mayo, may-ara sang 44 ka mga ambulant vendors sa area kag sa karun may-ara na sang lima nga nakatapos sa proseso.
Paathag sini nga imbes magpatigayon gilayon sang demolition ukon paghawan sa lugar, ginapakamaayo sang lokal nga panguluhan nga masugilanon anay ang mga vendors nga involved agud makahuman sang win-win solution.
Apang ginklaro ni Mayo nga wala nalakip sa vending ordinance ang pagbaligya sa Aguinaldo Street.
Gani ang nagaplastar sa area ang pangitaan sang pwesto sa North Capitol Road.
Apang paathag sini nga ‘grab and go’ set-up lamang ang ginarekomendar, ukon magabakal lamang kag magahalin, kag wala dapat sang mga stalls kag tables kun sa diin sarang makakaon ang bumalakal.
Dugang pa nga indi pwede ang permanent structure, kundi mga cart lamang nga sarang makuha pagkatapos sang natalana nga oras.
Kalabanan sa mga ini ang may schedule alas-6:00 tubtob alas-10:00 sang gab-i, apang may mga vendors nga naga-ayo nga maka-extend ilabi na nga mga empleyado sang Business Process Outsourcing (BPO) Company ang ila target market.
