Ginkompirmar sang pinuno sang Comittee on Laws and Ordinances nga nalakip na sa ila committee report ang angot sa amendments sang Curfew Ordinance sang Bacolod City santo sa hingyo sang mga negosyante sang syudad.
Sa interview sang Bombo Radyo Bacolod kay Councilor Archie Baribar, ginpahayag sini nga may yara sila sang proposal nga kun ang syudad ang yara sa General Community Quarantine (GCQ) maga-umpisa ang curfew sang alas 10:00 sang gab-i tubtob alas 4:00 sang kaagahon apang kun yara ini sa Modified General Community Quarantine (MGCQ) magaumpisa ini sa alas 11:00 sang gab-i tubtob 04:00 sang aga kag sa tion nga magpaidalom na sa new normal maumpisa na ini sa alas 12:00 sang tungang gab-i tubtob alas 04:00 sang kaagahon.
Igasubmit man sini ang committee report para sa approval sang City Council kag sa madason nga semana, mahimo na sang mga ini nga masubmit ang ordinansa bilang urgent matter kag ipasar ini sa first, second, third kag final reading.
Ginpahayag man sini nga dako nga problema ang transportasyon bangud nabudlayan sila nga magkumbinsi sa transport group nga mag-operate nga lampas alas-8:00 sang gab-i.
Samtang, sa idalom sang Curfew Ordinance nga gin-author sang konsehal, ang mga nagalapas nga residente sang Bacolod ang pagamultahan sang P500 kag ang mga residente sa gwa sang siyudad ang pagamultahan sang P1,000.
