Patay ang American alternative pop singer kag internet personality nga si Oliver Tree kag lima pa ka mga indibidwal matapos magbunggo-anay sa kahawaan ang duha ka helicopter sa Brazil sang Dominggo, Hunyo 14.
Santo sa report, nakalista si Tree sa passenger manifest sa isa sa mga helicopter kag ginapahayag nga indi na makilal-an pa ang mga biktima bangud sa severe burn nga ila naagom.
Nagbunggo-anay ang duha ka helicopter sa western district sang Recreio dos Bandeirantes sa Rio de Janeiro antes naghugpaas sa paradahan sang isa ka dealership sang mga electric car.
Bangud sini, suno sa mga bumbero, ginabanta yara sa 20 ka mga salakyan ang nasunog.
Lima ang sakay sa isa ka helicopter, samtang piloto lamang ang sakay sa isa pa.
Kilala ang 32-anyos nga si Tree, sa iya nga colorful kag pinasahi nga bowl haircut kag masami ini nga ginahimo nga meme sa internet.
Nagsikat siya sa mga kanta nga Life Goes On, Miss You, kag Alien Boy kag may masobra 11 million nga listeners sa Spotify.
Ginpahayag ni Lieutenant Colonel Fabio Contreiras, spokesperson sang fire services, nga indi pa klaro kun paano ang eksakto nga natabo ang insidente.
