Plano sang Bacolod City Police Office (BCPO) nga pasakaan sang kaso ang american national nga nagtuga sang gamo sa Aguinaldo Street, Brgy. 34, Bacolod City bangod sa pagguba sang imahen sang Bacolod City.
Madumduman nga naggwa ang video sang US citizen nga si Isaac Stafford, 42 anyos, nagapuyo sa Prk 3, Brgy Masaling, Cauayan, Negros Occidental, nga nagamulay sa duha ka security guard matapos sang gina-alegar nga wala sang ginhimo ang duha sang ginkawat ang iya nga bag.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 2, sa imbestigasyon natumod nga antes paman ang video nga kuha mismo sang foreign national, may ara na ini sang komprontasyon kay Barangay 34 Kagawad Rene Mark Begemino, 43 anyos.
Ang Kagawad ang una nga nagpadulong sa lugar bangod nagbakal ang iya kabataan sa mga food carts sang nagpark man sang motorsiklo sa atubang sang salakyan si Stafford.
Ini ang ginsaway sang kagawad bangod indi na makagwa ang salakyan kag didto na nag-umpisa ang komosyon kun sa diin ginsipa sang hubog nga foreign national ang kagawad apang ini ang nakalikaw.
Wala man naga-untat ang pagpamuyayaw sini gani nagpalayo nalang ang kagawad agud makalikaw sa gamo.
Kasunod sini siya ang ginpanugyanan nga maglakat-lakat anay agud mabulubugnawan ang pinsar, apang ini ang nasundan sang komprontasyon sini sa duha ka guard sang isa ka dako nga building.
Panindugan ni Stafford nga ginbutang lamang sini sa motorsiklo ang bag, apang ini ang ginkawat, nga suno sa mga gwardiya mahimo gintaban sang mga kabataan.
Sa video nga gin-upload sini sa social media, halos indi man makaeksplikar ang mga gwardiya bangod sa wala untat nga pamuyayaw sang foreigner kag nagpamahog pa ini nga akusaran niya ang Bacolod City kun indi makita ang iya bag.
Suno kay Tolentino, ginlibot nila ang foreigner sakay sa patrol car agud matumod ang lugar nga mahimo nabilinan sini sang bag, kag makita ang mga nakaupod sini sa inom apang ini ang natulugan lamang sa byahe.
Matapos sang insidente, ang foreigner ang nahibaluan nga liwat pa nga nag-inom sang makahulubog nga ilimnon.
Suno kay Tolentino, nagrequest na sila sa mga palibot nga establishimento sa pagcheck sang CCTV footages kun matuod ang alegasyon sa nadula nga bag.
Sa pihak nga bahin, ginatundugan naman ni BCPO Director Police Col Joeresty Coronica nga siya ang magapakig-angot pa sa Bacolod City Legal Office sa kaso nga mahimo ipasaka batok kay Stafford.
Suno diri, ginaguba sini ang imahen sang Bacolod City, samtang may inconsistency man sa pahayag sini nga pagkadula sang yabi sang iya motorsiklo kaupod sa bag.
Panindugan sini nga foreign national man ukon lokal, kun may sala nga nahimo, dapat gid nga manabat.
Pahanumdom na lamang sini nga likawan ang magpost sa social media sang mga makapalain sa isa ka lugar ilabi na kun indi man mapamatud-an.
