Wala nagakahangawa ang mga pumuluyo sa Estados Unidos apisar nga nagatuga sang pagpamahog sang paglapad sang gyera ang pagpalupad sang US-made missiles sang Ukraine sa Russia.
Ang ini nga pagpang-atake ang natabo duha ka adlaw matapos nga ginhatagan sang administrasyon ni President Joe Biden sang green light ang Kyiv nga gamiton ang mas malaba nga range sang mga armas sang Amerika batok sa mga targets sa sulod sang Russia.
Nagpaandam naman si Russian President Vladimir Putin sa Estados Unidos nga magagamit ini sang nuclear weapons kag magatimalos antes matapos ang 2025.
Suno kay Bombo International News Correspondent Noor Moraña, apisar sang pagpamahog sang Russia, wala sila nagakahangawa bangud antes ini, nakaistoryahanay sanday Biden kag President-elect Donald Trump sa White House sa sulod sang kapin 90 ka minutos kag ginapatihan nga nalakip sa ila gindiskusyunan ang mga tikang may kaangtanan sa nagakatabo nga mga gyera.
Suno kay Moraña, apisar nga maka-escalate pa sang gyera ang ginhimo sang Biden administratio, nagapati ang mga Amerikano nga nalakip lamang ini sa mga stratehiya sang duha ka Presidente agud nga mapauntat ang gyera.
Madumduman nga nagpahayag si Trump nga antes ini opisyal nga magpungko bilang Presidente sang Amerika sa Enero 20, 2025, matapos na ang gyera sa Ukraine.
