Ginapakamaayo sang AMLIG TUBIG nga nakita ni Bacolod City Mayor Alfredo “Albee” Benitez ang mga kapaltahan sang Joint Venture Agreement (JVA) sa tunga sang Bacolod City Water District (BACIWA) kag Prime Water.
Ini kasunod sang pronouncement sang alkalde nga ginatun-an sini ang posibilidad sang pagterminate sang JVA.
Sa interview sang Bombo Radyo Bacolod kay former Bacolod City Councilor Wilson June Gamboa, lead convenor sa Amlig Tubig, isa sa provision sang JVA amo ang paghatag sang 24/7 nga supply sang tubig sa mga Bacolodnon.
Apang sa halos apat na ka tuig nga pagserbisyo, nagapati si Gamboa nga sobra na ang ginhatag nga tyansa kag dapat na ini nga mauntat.
Paathag sini nga nakaligad nga tuig, sila ang una na nga nagfile sang kaso para sa nullification sang JVA bangod sa nakita nga disbentaha sa interes sang mga konsumedor, kag ini ang ginpamatbatan na sang Court of Appeals.
Apang nag-apelar ang Prime Water sa korte nga ireview ang desisyon.
Ginapakamaayo naman ni Gamboa nga karun ang alkalde na mismo ang naghimo sang tikang bangod madugay pa kun hulaton ang desisyon sang korte.
Paathag sini nga sarang mapangabay sa Board of Directors sang BACIWA nga iterminate ang kontrata bangod sa mga wala natuman nga promisa sang Prime Water.
Apang sa tion nga magpakatig-a gihapon ang mga Board of Directors, panugyan sini nga sila ang pasakaan man sang kaso kriminal kag kaso administratibo, bangod ang mga ini mismo ang nagduso sang wala pulos nga JVA.
Sa paglantaw ni Gamboa, ang pinakamadasig nga paagi nga mahimo amo ang pagterminate sang kontrata, pagbalik sa management sang water distribution sa BACIWA, pagreinstate sa 59 ka mga gina-alegar illegally dismissed nga mga empleyado, kag pag-ilis sa tanan nga mga Board of Directors sang BACIWA.
Panindugan sini nga dapat ma-islan ang mga ini sang maayo nga mga empleyado nga naga-ulikid sa konsumedor kag indi sa mga negosyante.
Dugang pa sini nga panawagan nga dapat dulaon man ang 12 percent Value Added Tax (VAT) nga ginapas-an sang mga konsumedor.
Apang ginakahangaw-an naman sini hinali nga iterminate sang alkalde ang JVA sa Prime Water, apang ini ang magapasulod naman sang bag-o nga concessionaire.
Suno diri, may huring-huring na nga luyag pasudlon ni Benitez ang Manila Waters, apang pahanumdom ni Gamboa nga ang kompanya ang may issue man sa Metro Manila.
