BACOLOD CITY-Madamo karon sang tikang nga pagahimuon ang Amlig Tubig angot sa ila nga pagpamatok sa joint venture agreement sa tunga sang Bacolod City Water District (Baciwa) kag sang Prime Water Infrastructure Corporation.
Ini kasunod sang pag-upod nila kahapon sa hublag-protesta nga ginpatigayon sa atubang mismo sang Baciwa kag sa Bacolod Government Center.
Sa interview sang Bombo Radyo Bacolod kay Councilor Wilson Gamboa Jr. nga miyembro sang Amlig Tubig, ginpahayag sini nga luyag nila makighinun-anon kay Mayor Evelio “Bing” Leonardia kag mag-atubang man sa session sang Sangguniang Panlungsod sang Bacolod.
Magluwas diri, magapangayo man ang ila grupo sang terms of reference, feasibility study kag appraisal report sang Baciwa.
Dugang pa ni Gamboa nga plano man nila nga magpasaka sang kaso batok sa board of directors sang water district.
May angot diri, nag-istorya na ang Amlig Tubig sa Integrated Bar of the Philippines-Negros Occidental Chapter sa mga tikang nga ila dapat himuon.
Nagapanawagan naman ang konsehal sa board of directors sang Baciwa nga mag-resign na lamang bangud wala naman sila naga-representar sang interes sang publiko.
