Nagalaom ang Amlig Tubig nga mangin transparent ang Bacolod City Water District (BACIWA) sa eligibility status sang mga water supplier nga naga-bid para sa joint venture agreement sa water district.
Sa interview sang Bombo Radyo Bacolod kay Councilor Wilson Gamboa, hulaton sang Amlig Tubig ang resulta sang evaluation sa Prime Water Incorporated bangud napakita na sang Manila Water ang ila Eligibility Status.
Suno kay Gamboa, nagapamatok ang grupo sa kakulang sang transparency kag public consultation.
Ginakonsiderar man sang grupo nga case study ang ginaluto nga joint venture agreement sang BACIWA.
Aminado ang konsehal nga ginapahanugutan ang joint venture basta indi ini disadvantageous ukon disbentaha sa local government unit.
Nahibaluan nga magasapol ang mga opisyal sang Bacolod City Water District (Baciwa) upod ang Office of the Government Corporate Council (OGCC) sa masunod nga semana agud hambalan kun eligible ukon indi ang Manila Water sa Joint Venture Agreement.
Madumduman nga nag-challenge ang Manila Water sa Prime Water Incorporated para sa Public-Private Partnership (PPP) sang nasambit nga water district bangud nakapasar na ang Prime Water sa tatlo ka phase sang JVA nga legal, technical kag financial gani subject for competetive challenge na ini santo sa 2013 National Economic and Development Authority (NEDA) guidelines.
