Nagalaom si Councilor Wilson Gamboa Jr., convenor sang Amlig Tubig nga pamatian sang korte ang ginfile nila nga civil case nga preliminary injunction batok sa joint venture agreement sang Bacolod City Water District (BACIWA) kag Prime Waters nga natalana nga magtake-effect sa Nobyembre 1.
Sa interview sang Bombo Radyo kay Gamboa, ginpahayag sini nga sa Oktubre 27, alas 8:30 sang aga, patigayunon ang hearing kag nagalaom ini nga pamatian sang korte ang ila ginapangabay nga temporary restraining order sang JVA.
Suno kay Gamboa, wala sila ginhatagan sang supisyente nga oras bangud delayed sang isa ka bulan ang paghatag sang kontrata sang JVA apang apisar sini, gintinguhaan sang Amlig Tubig nga makabalay sang civil case.
Aminado man ini nga gamay lang ang ila tiyansa bangud consumated na ang kapin P6.3 billion nga kontrata apang nagalaom ini nga maapresyar sang korte ang ila tikang bangud diri nakasalalay ang puturo sang ciudad ilabi na sang mga kabataan.
Gindugang man sang konsehal nga nakatipon sila sang 25,000 signatories gikan sa mga konsumedor kag may 12 ka barangay sa ciudad nga nagpasa sang resolusyon nga nagapamatok sa JVA.
Nagapangabay man ini nga updan sang tanan ang ila ginapakigbato bangud kun madayon ang JVA, magluwas sa magasaka ang balayran sang mga konsumedor, wala pa sang kasiguraduhan kun mahatagan ang ciudad sang insakto nga serbisyo sa tubig.
