Ginpamatbatan sang korte ang pila ka miyembro sang pamilya Ampatuan nga guilty sang multiple murder may kaangtanan sa pag-massacre sa 58 ka mga tawo sa probinsya sang Maguindanao sang Nobyembre tuig 2009 nga ginkabig bilang pinakamalala nga election-related violence sa Pilipinas.
Sa desisyon nga gindagdag ni Judge Jocelyn Solis-Reyes sang Quezon City Regional Trial Court Branch 221, ang Ampatuan clan members nga naconvict amo sanday Datu Unsay mayor Andal Ampatuan Jr., former Autonomous Region in Muslim Mindanao governor Zaldy Ampatuan, Anwar Ampatuan Sr., Anwar “Ipi” Ampatuan Jr., kag Anwar Sajid “Ulo” Ampatuan.
Sila ang ginpamatbatan nga guilty sa 57 counts of murder.
Kaupod pa gid sanday Manny, Mohades, kag Misuari Ampatuan, pila ka mga police officers kag iban pa nga personalidad, sila ang ginsentensyahan sang reclusion perpetua ukon tubtub 40 ka tuig nga pagkapriso nga wala sang parole.
Ang 14 naman ka mga pulis kag si Bong Andal nga amo ang nag-operate sang backhoe nga gingamit sa paglubong sa mga bangkay kag mga salakyan ang ginsentensyahan sang anom tubtub napulo ka tuig nga pagkapriso bangud sila ang nagserbe nga accessories sa krimen.
Ang patriarch nga si Andal Sr. Ang nalakip man sa mga akusado apang napatay ini bangud sa liver cancer samtang yara siya sa prisuhan sang tuig 2015.
Samtang apat naman ka mga Ampatuan nga amo sanday Akmad alias “Tato,” Sajid Islam, Jonathan, Jimmy, kaupod ang dinosena ka iban pa nga indibidwal ang na-acquit ukon naabswelto sa ground of reasonable doubt; tatlo ang na-acquit bangud sa absolute failure sang prosekusyon nga pamatud-an ang ila guilt.
Gilayon naman nga ginmandu sang korte nga hilwayon ang mga acquitted magluwas lamang kun sila ang nagapangatubang sang iban pa gid nga kaso.
Sa 761 ka pahina nga desisyon sang korte, ginmanduan man sang judge ang principal accused nga bayaran sang millions of pesos sa himata sang mga biktima, magluwas lamang sa photojournalist nga si Reynaldo “Bebot” Momay, ang ika-58 nga massacre victim nga wala pa gid nasapwan ang iya lawas tubtub subong.
Ang desisyon sang korte ang ginpapanaog makaligad ang masobra napulo ka tuig humalin sang natabo nga massacre sang Nobyembre 23, 2009.
