BACOLOD CITY — Nagalaom ang isa ka anak nga makit-an ang iya iloy nga nahamulag 37 na ka tuig ang nakaligad.
Si Arlene Albino Oraya ang nagaedad pa lamang sang 6 ka tuig sang aksidente nga nahamulag sa iya iloy nga si Matilde Montallana Albino sa rotonda sa Pasay City.
Indi maayo ang paminsaron sang iloy matapos nga nagsufrer sang nervous breakdown kag ginpalagyo sini si Arlene sa iya amay nga si Arturo.
Nabuy-an ni Matilde ang kamot sang iya anak sa tunga sang madamo nga tawo kag wala na niya nabalikan.
Masobra isa ka bulan nga nagliho-liho kag nagpakilimos si Arlene bangud wala man ini nakit-an sang iya amay tubtub nga ginsapupo ini sang mag-asawa nga tag-iya sang carinderia.
Agud nga makaeskwela, ginbunyagan si Arlene sa pangalan nga Lorna Cunanan, apelyido sang nag-ampon sa iya.
Tuig 2012 sang nakatrabaho sa luwas sang pungsod si Arlene kag iya ginsuguran ang pagpangita sa iya amay paagi sa Facebook.
Tuig 2014, natultulan sini si Tatay Arturo sa Samar.
Indi na makakita si Arturo sang amo nga tion apang gindala ini ni Arlene sa ila balay sa Pampanga kag ginpaoperahan pinaagi sa eye transplant.
Sang nagdangop sa albularyo, ginpahayag sini nga yara sa isa ka barangay sa Bacolod si Matilde rason nga nagapasimpalad si Arlene nga pangitaon ang iya iloy.
Pinaagi sa Bombo Radyo, nagpanawagan si Arlene sa sin-o man nga nakakilala kay Matilde Montallana Albino nga makig-angot sa estasyon agud nga sila ang makakit-anay.
Ang mag-iloy ang dungan nga magaselebrar sang kaadlawan sa Marso 16.
